මෙතෙක් කථාව,


මෙතෙක් කථාව,

    හසාරා, ෆියෝනා, ජෙරමි හා චමිල යනු 'සැජිටේරියස් උසස්-කණිෂ්ඨ විද්‍යාලයේ' පළමු වසරේ අධ්‍යාපනය හදාරන සිසුන් සිව් දෙනෙකි. දිනක් හසාරාගේ කුටියෙහි තිබී රහසිගතව සඟවන ලද කුඩා ට්‍රාන්ස්මිටරයක් ජෙරමි විසින් සොයාගනු ලබන අතර ඒ පිළිබඳ පරීක්ෂා කිරීමේදී එය මීට බොහෝ කාලයකට ඉහතදී ඔත්තු බැලීම සඳහා භාවිත කල උපකරණයක් බව සොයා ගනී. පසුව හසාරා විසින් සිය මිතුරිය වූ ෆියෝනා හටද ට්‍රාන්ස්මිටරය පිළිබඳව පවසන අතර ඇයද එය පරීක්ෂා කර බැලීමට ඉල්ලා සිටියි. මේ අතර එහි සැබෑ අයිතිකරු කවුරුන්ද යන්න සෙවීමට චමිල හා ජෙරමි උත්සාහ කරයි....

Friday, December 25, 2015

වාදක චමිල - (i-කොටස)



විහඟ ගී රාවයද රැගෙන, කවුළු පියන් පත් අතරින් ඇදී ආ උදෑසන හිරු කිරණ මෙතෙක් වේලා නිදි සුවයෙන් පසුවූ හසාරා ගේ නිදි ගැට බිඳ හෙළීය. පෙරදින බොහෝ ප්‍රමාද වී නිදිගත් බැවින් තරමක නිදිබර ගතියකින් දෙනෙත් පියන් වැසී යන්නට තැත් කලද ඊට ඉඩ නොදෙමින්ම ඈ සයනය මත හිඳ ගත්තාය. නුදුරින් වූ ඔරලෝසුව පෙරවරු හත සනිටුහන් කර තිබෙනු ඇගේ නෙතු මත නාභිගත විය. තමා හැරුණුකොට අනෙකුත් නේවාසික සිසු සිසුවියන් දැනටමත් අවදි වී ඇතුවාට සැකයක් නැත. සයනයෙන් නැගී සිටි ඈ මුවකට දොවා ගැනීම පිණිස කුටියෙන් නික්මුණාය.

නැවත කුටියට පැමිණෙන විට එහි වූ පරිගණකය පණගැන්වී තිබෙනු ඇගේ දෑසට හසු විය. විදුහලේ පරිගණක ජාලය හරහා හෝ තම විද්‍යුත් තැපැල් ගිණුමට හෝ කිසියම් දැනුම්දීමක්, පණිවිඩයක් පැමිණි විට අදාල පුද්ගලයා ඒ අසල රැඳී සිටී නම් ස්වයංක්‍රීයවම පණගැන්වෙන ආකාරයට එම පරිගණක වින්‍යාස ගත කර තිබූ අතර එවැනි දැනුම්දීමක් තමාට පැමිණි ප්‍රථම අවස්ථාව එය වූ බැවින් හසාරා කුහුලින් යුතුව පරිගණක තිරය වෙත එබුණාය. කිසිවෙකු විසින් ඈ වෙත එවනු ලැබූ කුඩා පණිවිඩයක් එහි දර්ශණය වෙමින් පැවතුණි.

Tuesday, September 29, 2015

අමතක නොවන රාත්‍රියක් - (iii-කොටස)

එය සැබෑවක් බව පසක් කරමින් කොරිඩෝව හරහා පැමිණෙන්නෙකුගේ පියවර හඬක් ඔවුනට ශ්‍රවණය විය. එහි රිද්මයෙන්ම පැමිණෙන්නේ කවරෙකුදැයි වටහා ගැනීමට අපහසු වූයේ නැත.

"ජිම් ! !"

දෙදෙනාගේම මුවින් එකවිට හඬ පිටවිය.

"ආ.... නෑ...."

හසාරාගේ අවධානය වහා ඉහලට යොමු විය. රාත්‍රී දහයෙන් පසුවත් ඈ තම කුටියේ විදුලි බුබුල දල්වා තිබුණාය !

ජිම් සෑම දිනකම රාත්‍රියේ මෙසේ ගමන් ගන්නා බව නේවාසික සිසුන්ට අළුත් දෙයක් නොවේ. නමුත් ඇතිවූ සිදුවීම් පෙළ හමුවේ හසාරාට මෙන්ම ක්‍රිස්ටියන්ට ද එය අමතකව ගොස් තිබුණි. විදුලි බුබුල දැල්වී ඇති බව දකින ජිම් කුටියට ඇතුළුවීම වැලැක්විය හැකි නොවේ. නමුත් මේ මහ රෑ ඇගේ කුටියේ පිරිමි ළමයෙකුද සිටිනු ඔහුගේ නෙත ගැටුණහොත් ඇතිවන්නේ ඊටත් වඩා බරපතල ප්‍රශ්ණයකි. පියවර හඬ කෙමෙන් කෙමෙන් ලංවනු ඇසේ. ජිම් කුටියට ඇතුළු වීමට ප්‍රථම වහා පිරිමි ළමයාව සැඟවිය යුතුය. නමුත් කොහිද? හසාරාගේ දෑස් වේගයෙන් කුටිය සිසාරා ඇදී ගියාය. 

Friday, September 11, 2015

අමතක නොවන රාත්‍රියක් - (ii-කොටස)



"ඒක මේ.... එක්තරා ආකාරයක ට්‍රාන්ස්මිටර් එකක්. ඔයා දන්නවනේ.... සම්ප්‍රේෂක. අර.... ගුවන්විදුලි තරංග විසුරුවා හරින්න ගන්නේ...."

පිරිමි ළමයා උද්යෝගය මුසු වූ කලබලයෙන් කියාගෙන ගියේය. හසාරා එය දන්නා බව හැඟවීමට හිස සැලුවාය.

"ඔයා කියන්න හදන්නේ ඔයා හොයන්නේ ගුවන්විදුලි තරංග සම්ප්‍රේෂකයක් කියලා නම්, මට කියන්න වෙන්නේ ඔයාට හරියට බොරුවක් වත් ගොතා ගන්න තේරෙන්නේ නෑ කියලයි. මොකද ඒ වගේ දෙයක් හොයනවා නම් ඔයා යන්න ඕනේ කාමර ගානේ නෙවෙයි, නේවාසිකාගාරයෙන් එළියටයි. මම අහලා නැහැ කාමර ඇතුලේ තියාගෙන පාවිච්චි කරන්න පුළුවන් සම්ප්‍රේෂක ගැන."

ඔහු හා දෙඩවීම නිශ්ඵල යැයි වැටහී ගිය හෙයින් ද්වාරය වසා දැමීමට උත්සාහ කරමින් හසාරා පැවසුවාය.

Friday, September 4, 2015

අමතක නොවන රාත්‍රියක් - (i-කොටස)



සිත සතුටින් පවතින විට කාලය වේගයෙන් ගලා යන බැව් සපථ කරමින් තවත් දින කිහිපයක් සුපුරුදු පරිදි ගෙවී ගියේය. මේ කාලය තුලදී තම පන්තියේ මෙන්ම ඉහල ශ්‍රේණිවලද සිසු සිසුවියන් බොහෝ දෙනෙකු දැන හඳුනා ගැනීමට හසාරාට අවස්ථාව උදාවිය. සුහදශීලී මෙන්ම නිහතමානී දැරියක් වූ ඈ සියල්ලන්ගේම ගෞරවයද නිතැතින්ම හිමිකර ගත්තාය. නමුත් මෙහිදී ද ඈ අකමැතිම දෙය වූයේ සියල්ලන්ම තමාට 'කුමරිය' කියා ආමන්ත්‍රණය කිරීමය. ඇගේ පියා 'හැත්තෑ නව වෙනි ග්‍රහලොවේ' මනුෂ්‍යන්ගේ පාලකයා වූ හෙයින් එනමින් ඇයව ඇමතීම සාමාන්‍යය කාරණාවක් වුවද, සිය මව් ග්‍රහලොවේදී පවා මෙම වදනට අකමැති වූ ඈ සිතා සිටියේ පෘථිවියට පැමිණීමෙන් අනතුරුව සියල්ල වෙනස් වනු ඇතැයි කියාය. තමා අන් අයට වඩා උසස් යන හැඟීමක් ජනිත කරවන එම වදනට වඩා තම සැබෑ නමින්ම ආමන්ත්‍රණය කරනු දැකීම ඇගේ බලාපොරොත්තුව වුවද, මේ පාසලේ සිටින කාලය පුරාවටම කිසිඳු සිසුවෙක් හෝ සිසුවියක් තමාට එසේ ආමන්ත්‍රණය නොකරන බව නම් ඇයට මනාකොට වැටහීගොස් තිබුණි.

Wednesday, July 29, 2015

පාගමනක්



සිය ප්‍රථම පාසල් දිනය ආරම්භයේදී තරමක චකිතයක් හසාරාගේ සිත තුල තිබුණද දිනය ගෙවී යද්දී එය යටපත් කරමින් ප්‍රීතිය මුසු හැඟීම් පෙළක් නැගී එන්නට විය. එම හැඟීම් පෙළ දෙගුණ තෙගුණ වූයේ පාසල අවසන් කිරීමට තවත් හෝරාවක් පමණ තිබියදී ගුරුවරිය ඉදිරිපත් කල අපූරු අදහසක් නිසාවෙනි.

"මොකද කියන්නේ.... අපි ටිකක් ඇවිදින්න යමුද?"

සිසුහු එක හඬින් එයට කැමැත්ත ප්‍රකාශ කළහ. මුළු උදය වරුවේම ජිම් සමග පාසල් බිමේ අස්සක් මුල්ලක් නෑරම නැරඹූ ඔවුහු තවත් නොබැලූ තැනක් ඇත්දැයි කුහුලකින්ද යුතුව ගුරුවරිය සමග ගමන් ගත්හ. නමුත් ඈ ඔවුන්ව රැගෙන ගියේ පාසලේ එක් අන්තයක වූ පටු මාවතක් වෙතටයි. පාසල වටා පිහිටි වනාන්තරය තුලට ගමන් ගත් එය වර්ණවත් වියළි ශාක පත්‍ර වලින් වැසී ගොස් තිබුණි.

Saturday, July 25, 2015

අපූරු පාසලේ පළමු දිනය - (ii-කොටස)



"තරු රටා පාසල් ජාලයේ අනෙකුත් පාසල් වලට වඩා තරමක් වෙනස්, සුවිශේෂී පාසලක් විදිහට සැජිටේරියස් පාසල හඳුන්වන්න පුළුවන්. ඉන් ප්‍රධානම දේ තමයි 'ශිෂ්‍ය රුචිකත්වය' ට මුල් තැන දෙන ඉගැන්වීම් ක්‍රමවේදයක් මෙහි භාවිත කිරීම. මේ ක්‍රමයේදී ශිෂ්‍යයාට පාසල් පරිපාලනයෙන් ලබාදෙන කාලසටහනට අනුගතව විෂයන් ඉගෙනගන්නවා වෙනුවට තමන් කැමති වේලාවකදී කැමති විෂයයක් හැදෑරීමේ අවස්ථාව ලබා දෙනවා. සෑම වාරයක් ආරම්භයේදීම එම වාරයට අදාල විෂයන් හා එම විෂයන් සඳහා වෙන්කොට ඇති කාලඡේද ප්‍රමාණය පිළිබඳ ලේඛණයක් සිසුන්ට ලැබෙන අතර තමන් කැමති ආකාරයට සතියේ දින වලට විෂයන් බෙදාගෙන හැදෑරීමේ අවස්ථාව සිසුන්ට හිමිවෙනවා....

Friday, July 17, 2015

අපූරු පාසලේ පළමු දිනය - (i-කොටස)



තමාට නින්ද ගියාදෝ, නොගියාදෝ යි සැකයකින් යුතුව වෙනදාටත් වඩා වේලාසනින් හසාරා අවදි වූවාය. එදින කවදාදැයි සිහිපත් වෙත්ම සිරුර පුරා දිවගිය ප්‍රබෝධවත් හැඟීම ඇගේ නිදිමත ක්ෂණයකින් පළවා හැරියේය. මුව දොවා ගැනීමට, කුටියෙන් නික්මී කොරිඩෝව වෙත පා තබනවාත් සමගම ඇගේ දෑස් මත සිත්තම් වූවේ නානකාමරය පිහිටි ඉසව්වේ සිට සිය කුටියට පියමනිනා ෆියෝනාගේ රුවයි. ඇය අවදිව ඇත්තේ තමාටත් පෙරාතුවයි.

"සුභ උදෑසනක් ! ඊයේ රෑ හොඳට නින්ද ගියාද?"

හසාරා දුර සිටම විමසා සිටියාය.

"සුභ උදෑසනක් ! මං හිතන්නේ මට පැය දෙකක්, තුනක් වගේ නම් හරියට නින්ද යන්න ඇති."

ෆියෝනා පිළිතුරු දුන්නේ සිනාමුසු මුහුණෙනි.
 

Friday, July 10, 2015

අළුත් මිතුරියක් - (v-කොටස)



ඈ යුහුසුළුව කුටියෙන් නික්මී ජිම් පසුපසින් යන්නාවූ නවක සිසුන් අතලොස්සට එකතු වූවාය.

"හැමදාම.... එකම රටාව...."

ඈ පසුපසින් හුන් ෆියෝනා තාලයකට පැවසුවාය.

හසාරා හා ෆියෝනා හැරුණු කොට තවත් සිසුන් තිදෙනෙකුගෙන්ද, සිසුවියන් දෙදෙනෙකුගෙන්ද නවක සිසු පිරිස සමන්විත විය. ඔවුහු නේවාසිකාගාරයෙන් නික්මී කෘත්‍රිම ආලෝක ප්‍රභව වලින් අඳුර පළවා හරිනු ලැබූ, දිගු සෙවණැලි වලින් රටා මැවුණු විදුහල් බිම ඔස්සේ ජිම් අනුව පා නගන්නට වූහ. හාත්පස වෙලාගෙන පැවති නිහඬතාවය බිඳ දමමින් තරඟයට මෙන් නැගුණු නිශාචර කෘමීන්ගේ හඬ ඔවුන්ගේ සවන්පෙති සිසාරා ඇදී ගියේය. අවසානයේ ඔවුහු විදුලි බුබුලු වලින් ආලෝකවත් කර තිබූ ගොඩනැගිල්ලක් වෙත පැමිණියහ. එය විදුහලේ ආපනශාලාව විය. 

Sunday, June 28, 2015

අළුත් මිතුරියක් - (iv-කොටස)




"ආ.... ඔව්.... න්.... නෑ.... නෑ.... තමුන්ලට ඒ කථාව අදාල නෑ....."

පියවි සිහියට එළඹෙමින් ජිම් පැවසුවේ දැඩි හඬිනි.

"මට දැන් යන්න වෙනවා.... වැඩ ගොඩක් තියෙනවා.... ගැහැණු ළමයින්ගේ නාන කාමර මේ කොරිඩෝවේ කෙළවරම තියෙනවා.... පාඩම් කාමරය පහළ තට්ටුවේ තියෙනවා.... ඒ වගේම තමයි මතක තියාගන්න, මේ නේවාසිකාගාරයේ විනය ගැන මං බොහොම තදින් හොයා බලනවා...."

හේ පැවසුවේ හසාරා වෙත වැඩි අවධානය යොමු කරමිනි. ඈ කිසිවක් පවසන්නටත් ප්‍රථම ඔවුන්ගෙන් මිදුණු ඔහු කොරිඩෝව දිගේ ඉදිරියට ඇවිද යන්නට විය.

Monday, June 15, 2015

අළුත් මිතුරියක් - (iii-කොටස)




"ආ....හා.... තවත් අළුත් ශිෂ්‍යාවක්"

"ඔව් මර්බෙට් මහත්මයා.... මම හසාරා සුවිමාලි" 
 
ඈ තරමක් ගෞරව සම්ප්‍රයුක්තව පැවසුවාය.

"හසාරා සුවිමාලි. හැත්තෑ නව වෙනි ග්‍රහලෝකයේ කුමාරිකාව"

ජිම් කියාගෙන ගියේය.

"දැක්කනේ.... මම තමුන්ව දන්නවා.... ඒක නෙවෙයි, මට ඔය 'මර්බෙට් මහත්මයා' කියන කොටස කියන්න එපා.... නිකන්ම 'ජිම්' කියන්න. සරලවම.... 'ජිම්'. මොකද කෙටියෙන්ම කිව්වොත් 'මර්බෙට්', 'මහත්මයා' කෑලි වලට මම කැමති නැහැ."

හේ අවසාන වාක්‍යය පැවසුවේ තරමක් පහත් හඬිනි.

Saturday, June 13, 2015

අළුත් මිතුරියක් - (ii-කොටස)



“ජිම් ! !”

හසාරා විමතියෙන් එයම ප්‍රතිරාවය කළාය.

“ඔව්, ජිම්.... ජිම් මර්බෙට් මහත්මයා.... එයා තමයිලු මෙහේ ශාරීරික අධ්‍යාපන ගුරුතුමා. ඒ වගේම අපේ නේවාසිකාගාර බලාගන්නෙත් එයා....”

නමුත් එකවිටම යමක් මතක්වූවාක් මෙන් දැරිය කතාව මොහොතක් නතර කළාය.

            “ඒක නෙවෙයි..., මම ෆියෝනා ස්ටෝන්ස්. ඔයා...?”
 
ඈ සුරත හසාරා වෙත දිගු කළාය.

            “මම හසාරා සුවිමාලි.”

අතට අත දෙමින් හසාරා පැවසුවාය.

            “හසාරා සුවිමාලි !! ”

ෆියෝනා විමතියෙන් එයම ප්‍රතිරාවය කළාය.

Tuesday, June 9, 2015

අළුත් මිතුරියක් - (i-කොටස)



සියල්ලටම ප්‍රථමයෙන් ඇගේ දෑසට සිත්තම් වූයේ ගේට්ටුව අසලින් ආරම්භ වී ඈතින් වූ ගොඩනැගිලි දක්වා දිවෙන පුළුල් මාවතකි. මනා ලෙස නඩත්තු කරන ලද මල් පැල එහි දෙපස සීමා සනිටුහන් කල අතර, බැසයන හිරුගේ ආලෝකය වැදී ඒවා දිළිසුම් දෙමින් පැවතුණි. මාවත දෙපසත්, පාසල් භූමියේත් තැනින් තැන මනා සෙවණින් යුතු සුවිසල් වෘක්ෂයන් වූ අතර ඒවා පාමුල බංකු තබා තිබුණි. විදුහල් බිම ජන ශූණ්‍යව ඇතැයි බැලූ බැල්මට පෙනී ගියද අතරින් පතර එහා මෙහා යන සිසු සිසුවියන්ගේ ඡායා දැරියගේ නෙතු මත නාභිගත විය. නුහුරු පෙදෙසකට එක්වරම ඇතුල් වන්නෙකු තුල ඇතිවන චකිතයත් සිතෙහි දරාගෙනම ඈ සෙමින් මාවත ඔස්සේ පා නැගුවාය. එහි එක් පසක පාසලේ සිතියම ප්‍රදර්ශණය වෙමින් පැවති ඩිජිටල් සංඥා පුවරුවක් වූ අතර ඈ ඒ වෙත ආසන්න වත්ම සිතියම ඉවත් වී ඒ වෙනුවට එහි කිසියම් පණිවිඩයක් දිස්වන්නට විය.

Sunday, June 7, 2015

පෘථිවි ආගමනය - (v-කොටස)

කහ-තැඹිලි පැහැ තුරු මුදුන් මතින් සන්ධ්‍යා හිරු කිරණ නුබ ගැබ සිසාරා පැතිර ගොස් තිබුණි. විටින් විට වලාකුළු වියන් යටින් කැදලි කරා ඇදෙනා සියොතුන් ඒ මත අලංකාර රටා මැවීය. සිහින් මන්ද මාරුතයෝ ගත දැවටෙමින් ජනිත කලේ ප්‍රබොධමත් බවකි. නිශා යාමය එළඹීමට  ඉතිරිව ඇත්තේ තවත් හෝරා කිහිපයක් බැව් සිහිපත් කරන්නට මෙන් රැහැයියන්ගේ නිනොනවතින නාදය වා තලය සිසාර පැතිර යාම ඇරඹී තිබුණි. වියළි පත්‍ර වැටීමෙන් පාවඩ ලූවාක් මෙන් දිස්වන පුළුල් මාවත ඔස්සේ පියාත් දියණියත් ඉදිරියට පා නගන්නට වූහ.

Thursday, June 4, 2015

පෘථිවි ආගමනය - (iv-කොටස)


"මං මේක විතරක් අතේ අරන් යන්නම්.... අනික් බෑග් ටික අපි එහෙනම් ඉස්කෝලෙට යවමු."

අදාල ගමනාන්තය පවසන ලදුව, සිෆ් වරයා ඔවුන්ගෙන් නික්ම යන්නට වූ අතර පියා සහ දැරිය යාත්‍රාංගනය පසක වූ ගොඩනැගිල්ල වෙත පියවර එසවූහ.

ස්වයංක්‍රීය පිරික්සුම් දොරටු පසු කරමින් ගොඩනැගිල්ලෙන් පිටතට පැමිණි ඔවුන්ගේ දර්ශණ පථයට හසු වූයේ ඉදිරියෙන් ඇදී යන මහාමාර්ගයයි. දෙපසටම රථ වාහන ගමන් කල හැකි සේ තනා තිබූ එහි එක් පසක මං තීරු ද්විත්වය බැගින් වූ අතර සූර්ය බලයෙන් හෝ කෝෂ මගින් ධාවනය වන නිහඬ ස්වයංක්‍රීය රථ ඉන් එක් මං තීරුවකද, පා-පැදි අනෙක් මං තීරුවේද කිසිඳු තද බදයකින් තොරවම ගමන් ගනිමින් පැවතුණි. ලං ලංව ඉදිකොට තිබූ අහස උසට නැගි ගොඩනැගිලි මතින් නොයෙක් හැඩයෙන් හා ප්‍රමාණයෙන් යුත් ගුවන් යානාවෝ තැඹිලි වර්ණිත අහස පසුබිම් කර ගනිමින් ඈතට ඇදී ගියහ. පියා මෙන් නොව, තම සෞරග්‍රහ මණ්ඩලයේ හැර වෙනත් ග්‍රහලෝකයක් මත පා තැබූ ප්‍රථම අවස්ථව මෙය වූ බැවින් යථොක්ත දර්ශණය කුඩා දැරියගේ සිතෙහි ඇති කලේ උද්යෝගයක් මෙන්ම විමතියකි.

Monday, June 1, 2015

පෘථිවි ආගමනය - ( iii-කොටස)


සැබැවින්ම එය ප්‍රියජනක සන්ධ්‍යාවක් විය. නීල වර්ණ නුබ කුස වසාගෙන පැතිරී තිබුණු වලාවන් අහස් තලයම තැඹිලි පැහැයෙන් වර්ණ ගන්වා තිබුණි. එක් අන්තයක වූ පුළුල් ගොඩනැගිල්ලක් සහ ඒ හා සම්බන්ධව නිමවා තිබූ සුවිසල් තාප්පයකින් වටවූ විශාල බිම් කඩ මත, තැනින් තැන නවත්වා තිබූ විවිධාකාර හැඩයන්ගෙන් හා විවිධාකාර ප්‍රමාණයන්ගෙන් යුත් අභ්‍යවකාශ යානාවන් බැසයන හිරුගේ රශ්මිය වැදී දිළිසුම් දෙමින් පැවතුණි. විටින් විට ඒවා අතරින් එහා මෙහා ගමන් ගන්නා රොබෝවරුන් නොවන්නට එම දර්ශණය දෙස බලන්නෙකුට හැඟී යනුයේ එය කිසිවෙකුගේ තෙලිතුඩකින් නිමවූ සිතුවමක් දෝ යන හැඟීමකි.

Friday, May 29, 2015

පෘථිවි ආගමනය - (ii- කොටස)


දැරියගේ අවධානය කවුළුව වෙතින් බැහැරව තමා ඉදිරියෙන් වූ පුළුල් තිරය වෙත යොමුවිය. කෙමෙන් චලනය වන නීල වර්ණ පෘථිවියේ සහ අයිස් යුගයෙන් පසු දැනට ඉතිරි වී ඇති එකම ගොඩබිම් තලයේ දර්ශනය දෙස ඈ ඇසිපිය නොහෙලා බලා සිටියාය.

"තාප ආවරණය ක්‍රියාත්මක කිරීම ආරම්භ කරනවා..."

ඇගේ අවධානය බිඳී ගියේ යාන්ත්‍රික ගැහැණු කටහඬකින් ඇසුණු පණිවිඩයක් නිසාය. මේ වන විට ඔවුන් රැගත් යානය පෘථිවි වායුගෝලය හරහා යෑම ආරම්භ කර තිබුණි. පීඩනයේ කිසියම් වෙනසක් ඇයට හැඟුණද තවත් මිනිත්තු කිහිපයකින් එය සැහැල්ලු බවකට පරිවර්තනය විය. මේ වන විට දර්ශණ තිරයේ සම්පූර්ණයෙන්ම වාගේ දිස්වූයේ හරිත වර්ණයෙන් බබලන ගොඩබිමයි. ගතවන සෑම තත්පරයක් පාසාම එය වඩා විශාල වෙමින් එහි භූ විෂමතා පැහැදිලිව දෘෂ්‍යමාන වන්නට විය. තුරු මුදුන් වලින් වැසී ගිය උස් කඳු වැටි, රට මධ්‍යයේ සිට ගලා බසිනා ගංඟා, රන්වන් වෙරළ තීරය..... යානය තව තවත් ආසන්න වෙත් ම ගොඩනැගිලි හා මහාමාර්ග ද මැනවින් දර්ශණය වන්නට විය.

Wednesday, May 27, 2015

පෘථිවි ආගමනය - (i- කොටස)


සැබැවින්ම, එය නවමු අත්දැකීමකි. "සමපාත යන්ත්‍රය" හරහා ඈ විශ්වයේ මේ තරම් දුරක් පැමිණි පළමු අවස්ථාව මෙයයි. තාරකා විද්‍යාඥයන් විසින් "හැත්තෑ නව වෙනි ග්‍රහලොව" ලෙස හඳින්වූ ඇගේ මව් ග්‍රහලොවේදී නම් වරක් "අයිස් ග්‍රහයා" වෙත යෑමටද, තවත් වරක් "වාමන ග්‍රහලොවේ" විද්‍යාගාර වෙත යෑමටද ඇය එය භාවිතා කර තිබුණි. එම ගමන් වලදී නම් ඇය එතරම් විශ්මයකටත්, චකිතයකටත් පත් නොවූයේ මව් ග්‍රහලොවේ සිට නුබ ගැබ වෙත නෙත් යොමද්දී එම ග්‍රහයින් දෘෂ්ඨි සීමාවේ වැඩි ඉඩක් අත්පත් කරගෙන සිටි නිසාවෙන් වුවද , දහස් ගණනක් වූ තාරුකා අතර ඇයට කිසි ලෙසකින් වත් වෙන්කර හඳුනා ගත නොහැකි වූ තවත් කුඩා ආලෝක පුංජයක් වූ සූර්යයාත්, ඇගේ ග්‍රහලොවේ තිබූ උපරිම බලයක් සහිත දුරේක්ෂයෙන් නැරඹූ විටත් කුඩා නිල් පැහැ ගෝලයක් ලෙසින් දිස්වන පෘථිවියත් වෙත මේ තරම් ඇසිල්ලකින් පැමිණීම නම් ඇගේ සිත විශ්මයෙනුත්, චකිතයෙනුත් පිරවූවාට සැකයක් නොමැත.

Monday, May 25, 2015

හැඳින්වීම


මේ කථාව ඇරඹෙන්නේ අනාගතයෙනි, කවදා , කොතැනකදී යන්න තීරණය කිරීම කාලයට බාරය. කෙසේ වුවද මෙය පෘථිවියේ නව යුගයක සමාජ, සංස්කෘතිමය පැතිකඩ පිලිබිඹු කරන්නකි. මේ යුගයේ මිනිසාට සිහිනයක් වූ බොහෝ දෑ ඉටුවූ යුගයක් පිලිබඳ ගතු කියන්නකි.

මේ අනාගත ලොවෙහි වූ එක්තරා පාසලක සිසු සිසුවියන් කණ්ඩායමක් මින් ඉදිරියට දිගහැරෙන කථාවට පාදක වී තිබේ. නමුත් කථාවට පෙරාතුව වෙනස් වූ ලෝකය පිලිබඳව ඔබ දැනගත යුතුය. මන්ද යත් එවිට ඔබට නිරවුල් මනසකින් යුතුව අනාගතයට පිය මැනිය හැකි බැවිනි.

Friday, May 22, 2015

ආයුබෝවන් !


මා දයාබර පාඨකය, ඔබ මා ද, මා ඔබ ද නොහඳුනන දිනෙක අපි මෙසේ හමුවී සිටින්නෙමු.... සැප දුක් නොවිමසූ නමුදු පවසන්නට බොහෝ දේ අප දෙදෙනාටම ඇතුවා නොඅනුමානය. එ නමුදු ඔබට විරාමයක් දී මා හඬ අවදි කරන්නෙමි. මින් ඉදිරියට මා ඔබට පවසන්නට යන්නේ කථාන්දරයකි....  සැබැවින්ම කිවහොත් අනාගත ලොවක් පිලිබඳ කථාන්දරයකි..... ඒ අනාගත ලොව තුල ජීවත් වන අපූරු, පුංචි මිතුරන් සය දෙනෙක් මේ කථාවේ කථා නායකයින් වනු ඇත.... ඔවුන්ගේ ජීවිතය, දඟකාරකම්, අත්දැකීම් මින් ඉදිරියට මේ පත් ඉරු මත සටහන් වනු ඇත..... සැබැවින්ම කිවහොත්, මේ මගේ නොව ඔවුන්ගේ කථාන්දරයයි.....  ඉදින්, විඩාබර දිවි ගමනේ... සෙනෙහෙබර ඉසිඹුවක " තරු මිතුරෝ " සමග රැඳෙන්නට මා ඔබට ආරධනා කරන්නෙමි......


සුබ දවසක් !