මෙතෙක් කථාව,


මෙතෙක් කථාව,

    හසාරා, ෆියෝනා, ජෙරමි හා චමිල යනු 'සැජිටේරියස් උසස්-කණිෂ්ඨ විද්‍යාලයේ' පළමු වසරේ අධ්‍යාපනය හදාරන සිසුන් සිව් දෙනෙකි. දිනක් හසාරාගේ කුටියෙහි තිබී රහසිගතව සඟවන ලද කුඩා ට්‍රාන්ස්මිටරයක් ජෙරමි විසින් සොයාගනු ලබන අතර ඒ පිළිබඳ පරීක්ෂා කිරීමේදී එය මීට බොහෝ කාලයකට ඉහතදී ඔත්තු බැලීම සඳහා භාවිත කල උපකරණයක් බව සොයා ගනී. පසුව හසාරා විසින් සිය මිතුරිය වූ ෆියෝනා හටද ට්‍රාන්ස්මිටරය පිළිබඳව පවසන අතර ඇයද එය පරීක්ෂා කර බැලීමට ඉල්ලා සිටියි. මේ අතර එහි සැබෑ අයිතිකරු කවුරුන්ද යන්න සෙවීමට චමිල හා ජෙරමි උත්සාහ කරයි....

Tuesday, July 4, 2017

වැදගත් තොරතුරක්



     "මනුෂ්‍ය ශරීරය නිර්මාණය වෙලා තියෙන්නේ නිරන්තරව ක්‍රියාකාරී වීම සඳහා…. ඒ කියන්නේ ඇවිදින්න, දුවන්න, පනින්න වගේ කාර්යයන් වලට. නැතුව දවස පුරාම පන්ති කාමරයේ මේසයක් ළඟ වාඩිවෙලා, එහෙමත් නැත්නම් පරිගණකයක් ළඟ වාඩිවෙලා කාලය ගත කරන්න නෙවෙයි…."
     ජිම් ගේ උස් හඬ ක්‍රීඩා පිටියේ වා තලය සිසාරා පැතිර යන්නට විය. සිය සුපුරුදු ඇඳුම වෙනුවට විදුහල් ලාංඡනය සටහන් කරන ලද ජර්සියකින් හා දිගු ක්‍රීඩා කලිසමකින් සැරසී සිටි හේ කුඩා නළාවක් හා කාලමානයක් සහිත මාලයක් ගෙලේ පැළඳ සිටියේය. ඔහු මෙන්ම ක්‍රීඩා ඇඳුමින් සැරසී, සිය කුළුඳුල් ක්‍රීඩා පුහුණුව සඳහා පැමිණ සිටි පළමු වසර සිසු සිසුවියන් සියල්ලෝම ඔහු වටා ඒකරාශී වී සිටි අතර උදෑසන සිහිල් මදනල ඔවුන්ගේ සිරුරු අතරින් හමා යමින් පැවතුණි.

     "තමුන්ලා මතක තියා ගන්න, අපි පරිණාමය වෙලා තියෙන්නේ දිනපතා ආහාර සහ නිවාස සොයා විශාල දුර ප්‍රමාණයක් ගමන් කරපු සංචාරක මුතුන් මිත්තන්ගෙන් බව…."
     "අපි මේ කථා අහගෙන ඉන්නම ඕනෙද?"
     නුදුරින් හුන් සිය මිතුරන්ට පමණක් ඇසෙන සේ චමිල විමසා සිටියේ අකමැත්ත හඟවන ස්වරයෙනි.
     "මම ගොඩාක් කැමැත්තෙන් හිටියේ අද වගේ දවසක ටිකක් වැඩිපුර නිදා ගන්න"
     "ඒක හින්දාම තමයි ඔයා මේක අහගෙන ඉන්න ඕනේ...."
     ෆියෝනා පැවසුවාය.
     "එතකොට ඔයාට පැහැදිලි වේවි නින්ද කියන්නේ ව්‍යායාමයක් නෙවෙයි කියන එක."
     මේ අතර ජිම් සිය දේශණය දිගටම කරගෙන යමින් පැවතුණි.
     "අපේ ශරීරය ක්‍රියාකාරීව පවත්වා ගන්න ඉතාම වැදගත් දෙයක් තමයි ව්‍යායාම කියන්නේ.... තමුන්ලට දැනෙන්න ඕනේ නම් වඩා හොඳ බවක්, අවශ්‍ය නම් ලොකු ශක්තියක්, ජීවිත කාලයට වැඩි අවුරුදු ප්‍රමාණයක් එකතු කරගන්න ඕනේ නම්, හොඳම දේ තමයි ව්‍යායාම කරන එක. ඒ නිසා අපි සරල ව්‍යායාම් කිහිපයකින් අද ක්‍රීඩා පුහුණු වාරය ආරම්භ කරමු. හොඳයි.... කණ්ඩායම.... තුන් පෙළ.... ගැසේන්...!"
     ක්‍රීඩා පිටිය සිසාරා ඔහුගේ නළාවේ හඬ පැතිර ගියේය.
                   *                       *                      *                          *                        *
     විනාඩි විස්සක පමණ වෙහෙසකර ව්‍යායාම් මාලාවක් අවසානයේ සියල්ලන්ටම මද විවේකයක් ලබුණු අතර අන් සිසුන් මෙන්ම සිව් මිතුරෝද දහඩියෙන් පෙඟී ගිය ගතින් යුතුව ක්‍රීඩා පිටිය මත වාඩිවී වෙහෙස නිවා ගන්නට වූහ.
     "කවුද කියන්නේ ව්‍යායාම් කරන එක විනෝදයක් කියලා...."
     චමිල පැවසුවේ තණ පිටිය මත වැතිරෙමිනි.
     "ඔයා.... දිගටම කළොත්.... සමහර විට.... මුල් දවසේ තරම්.... මහන්සි දැනෙන එකක්.... නැහැ...."
     හසාරා පැවසුවේ හති ඇරීමට සිය වැකිය තැනින් තැන නතර කරමිනි.
     "අයියෝ.... කුමරිය. අද තත්වය දැකලා ඔයාට හිතෙනවද තවත් දවසක ක්‍රීඩා පුහුණුවට එන්න...?"
     චමිල විමසුවේ සිය මුහුණට නැගී තිබූ දහඩිය බිඳු සුරතින් පිස දමමිනි.
     "සමහරවිට හෙට දවස අදට වඩා හොඳ වෙන්න පුළුවන්...."
     හසාරා වෙනුවට ෆියෝනා පිළිවදන් දුන්නාය.
     "මට පේන විදිහට දැන්නම් අපිට ට්‍රාන්ස්මිටරයටත් වඩා ලොකු ප්‍රශ්ණයක් තියෙනවා...."
     වදනක් කථා කර ගැනීමට හැකිවූ සැනින් ජෙරමිද සිය හඬ අවදි කළේය.
     නමුත් ඔවුන්ගේ කථාවට බාධා කරමින් ජිම්ගේ නළා හඬ නැවත රැව් දුන්නේය.
     "ශාරීරික යෝග්‍යතාව. තම තමන්ගේ නම් කියනකොට ඇවිත් දුවන්න සූදානම් වෙන්න...."
     "අයියෝ.... මං හිතුවේ මේ කරදරේ ඉවරයි කියලා...."
     චමිල පැවසුවේ නොකැමැත්තෙන් නැවත පිටිය මත හිඳගනිමිනි.
     මේ අතර සිය සාක්කුවෙන් කඩදාසි කොළයක් ගත් ජිම් එය වෙත නෙත් යොමා එහි වූ නම් කියවන්නට වූවේය.
     "ජෙරමි ක්‍රිස්ටියන්, රකීත් ආකාශ්, චමිල ලක්ෂිත."
     "අද නම් ඇත්තටම අපේ දවසක් නෙවෙයි...."
     ජෙරමි පැවසුවේ බලාපොරොත්තු බිඳී ගිය හඬිනි. චමිලගේ මුවින්ද අකමැත්ත හඟවන හඬක් පිටවූ අතර නැගී සිටි ඔවුන් දෙදෙනා මිතුරියන්ට සමු දී ජිම් වෙත ඇවිද යන්නට වූහ.
     "කුමරිය, ට්‍රාන්ස්මිටරය ගැන මොනවා හරි හොයාගත්ත බවක් ජෙරමි ඔයාට කිව්වද?"
     ෆියෝනා විමසා සිටියේ හසාරා වෙත ළං වෙමිනි. එසේ වුවද ඇගේ දෑස් යොමුව තිබුණේ ඈතට ඇවිද යන පිරිමි ළමුන් දෙදෙනා වෙතයි.
     "තවම නැහැ"
     හසාරා පැවසුවේ හිස දෙපසට සොළවමිනි.
     "වැදගත් දෙයක් හොයාගත්තොත් එයා මට කියන්නම් කිව්ව නිසා මමත් ඒ ගැන අහන්න ගියේ නැහැ."
     "මම හිතන්නේ නැහැ එයාලා තවදුරටත් ට්‍රාන්ස්මිටරය පරීක්ෂා කරනවා කියලා...."
     ෆියෝනා පැවසුවේ පිරිමි ළමුන් දෙදෙනා වෙතින් නෙත් ඉවතට නොගනිමිනි.
     මේ වන විට ජෙරමි, චමිල හා රකීත් ජිම් වෙත ළඟා වී සිටි අතර හේ ඔවුනට ධාවනය පිළිබඳ උපදෙස් ලබා දෙන ආකාරයක් පෙනෙන්නට විය.
     "එහෙම නැත්නම් එයාලා කරුණු හංගනවා...."
     ".... නමුත් ඇයි එයාලා එහෙම දෙයක් කරන්නේ"
     හසාරා විමසා සිටියේ වික්ෂිප්ත වෙමිනි.
     "මම ඔයාට එක සැරයකුත් කිව්වනේ කුමරිය, පිරිමි ළමයිව විශ්වාස කරන්න අමාරුයි"
     සිසුනට ධාවනය ඇරඹීමට ලබා දෙන සංඥාවක් ලෙසින් ජිම්ගේ නළා හඬ සවන් කරා ඇදී ආවේය. ධාවනයේ යෙදෙන ජෙරමි හා චමිල වෙත රැඳුනු නෙත් ඇති මිතුරියන් දෙදෙනා අතර මොහොතක නිහැඬියාවක් පැතිර ගියේය.
     "ඔයාට පුළුවන් නම් ට්‍රාන්ස්මිටරය ජෙරමිගෙන් ඉල්ලලා දෙන්න. මට පුළුවන් වේවි ඒක ගැන එයාලා හොයාගත්තට වඩා වැඩි විස්තරයක් හොයා ගන්න. ඔයා දන්නවනේ අපේ තාත්තාගේ ඉලෙක්ට්‍රොනික් වැඩපල ගැන. ඕනි නම් තාත්තාට කියලා තවදුරටත් ඒක පරීක්ෂා කරලා බලන්න පුළුවන්...."
     මේ අතර ධාවනය අවසන් කර සිටි ජෙරමි හා චමිල දැඩි වෙහෙසකර බවින් යුතුව මිතුරියන් වෙත ඇවිද එමින් සිටියහ.
     "ඒත් මං කොහොමද ට්‍රාන්ස්මිටරය ජෙරමිගෙන් ඉල්ලන්නේ...? මගේ කාමරයේ තිබුණා වුණත් ඒක හොයාගත්තේ එයා නේ...."
     මේ වන විට පිරිමි ළමුන් දෙදෙනා ඔවුන් ආසන්නයටම පැමිණ සිටි බැවින් ෆියෝනා කිසිත් නොකීවාය.
     "අම්මෝ...."
     මිතුරියන් වෙත පැමිණි සැණින් චමිල තණ බිස්ස මත වැතිර ගත්තේය
     "මට නම් හිතෙන්නේ මාස ගාණකට ඇතිවෙන්න ක්‍රීඩා පුහුණුවක් අපිට අද ලැබුණා කියලයි...."
     ජෙරමිද පැමිණ ඔවුන් අසලින් හිඳ ගත්තේය. ඔහුගේ මුහුණින් දහඩිය බිඳු වෑහෙමින් තිබූ අතර උදා හිරු කිරණ වැදී ඒවා රිදී පැහැ දිළිසුම් ඇති කළේය.
     "ඇත්තෙන්ම. ඒත් බලන්නකෝ ජිම් දිහා.... අපි මේ තරම් මහන්සියෙන් ඉන්නවා කියලා එයාට පේන්නේ නැද්ද මන්දා...."
     සැබවින්ම, සිසු සිසුවියන් කෙසේ වෙහෙසට පත්ව සිටියද, ජිම් මීළඟට ධාවනයට සැරසිය යුතු ළමුන්ගේ නම් කියවමින් සිටියේය.
              *                     *                        *                           *                            *
     ෆියෝනා සඳහන් කල කරුණු නිසා එදින පුරා හසාරා සිටියේ අවුල් වූ මනසින් යැයි කිවහොත් වරදක් නැත. ට්‍රාන්ස්මිටරය පිළිබඳ කිසියම් වූ තොරතුරක් දැන දැනම ජෙරමි තමාගෙන් සඟවතැයි සිතීමට ඇයට කිසිලෙසකින් වත් පහසු නොවීය. ෆියෝනා පැවසූ පරිදි හේ ට්‍රාන්ස්මිටරය ගැන සෙවීම අත්හැරදමා වත්ද? එසේ වී නම් සමහරවිට එය ජෙරමිගෙන් ඉල්ලා ගැනීමට ඇයට හැකිවනු ඇත. කෙසේ වුවත් එදින සවස් වරුවේ ජෙරමිව හමුවී මේ පිළිබඳව පෞද්ගලිකවම කථා බහ කිරීමට අවසනයේදී ඈ තීරණය කළාය.
     තෙවන මහලේ අට වැනි කුටියට හසාරා පැමිණෙන විට කාමරයේ සිටියේ චමිල පමණි. නමුත් ඔවුන් දෙදෙනාට බොහෝ වේලාවක් දොඩමළු වෙමින් සිටින්නට ඉඩ ලැබුණේ නැත. මොහොතකින් කුටියේ ද්වාරය විවර කරමින් ඔවුන් ඉදිරියේ පෙනී සිටියේ ජෙරමි ය. ඔහු වතින් කිසියම් උද්යෝගයක මෙන්ම නොඉවසිලිමත් ස්වභාවයක සළකුණු දිස්විය.
     ".... ඔයත් ඉන්න එක හොඳයි කුමරිය. එන්න.... මට අද වැදගත් යමක් හොයාගන්න පුළුවන් වුණා...."
     හේ යුහුසුළුව මේසය මත වූ පරිගණකය ක්‍රියාත්මක කර සියත් වූ එස්.ඩී.ඒ උපාංගය ඒ හා සම්බන්ධ කළේය. මොහොතකින් පරිගණක තිරය මත කිසියම් පණිවිඩයක් දිස්වන්නට විය. මෙතෙක් වේලා සයනය මත හුන් හසාරා හා චමිල වහා පැමිණ පරිගණකය වටා රොක් වූහ.
     "මේක මම ට්‍රාන්ස්මිටරයේ තිබුණ ද්වීමය පරිවර්තකය ගැන හොයද්දී හමුවුණ දෙයක්"
     ජෙරමි පැවසුවේ පරිගණකය ඉදිරියෙන් වූ අසුනෙහි හිඳ ගනිමිනි. අන් අයද පරිගණක තිරය පැහැදිලිව පෙනෙන අයුරින් නුදුරින් වූ අසුන් මත හිඳ ගත්හ. පරිගණක ආශ්‍රිත ක්‍රියාකාරකම් කිහිපයක නිරත වූ ජෙරමි මොහොතකින් කිසියම් 'පර්යේෂණ පත්‍රිකාවක්' තිරය මත දර්ශනය කරවීය.
     "මේ මොකක්ද?"
     කිසිවක් තේරුම් ගැනීමට නොහැකි වූ චමිල විමසා සිටියේය.
     "ද්විමය දත්ත රටා හඳුනාගැනීම සහ ඒවා පරිවර්තනය කිරීම, හාන්ස් ක්ලොට්ස්"
     හසාරා කාටත් ඇසෙන සේ එහි නම කියවූවාය.
     "ඔයාලා විශ්වාස කරනවා නම් විශ්වාස කරන්න, ඕක තමයි අර 'ද්විමය පරිවර්තකය' නිපදවපු පර්යේෂණ වාර්තාව."
     "ඔයා කොහොමද මේක හොයා ගත්තේ...?"
     හසාරා විමසුවේ විශ්මය පිරි මුවිනි.
     "ඕක හොයාගෙන මම ජාතික ආරක්ෂක ලේඛනාගාරයේ ප්‍රධාන පරිගණක පද්ධතිය දක්වාම ගියා...."
     ජෙරමි පිළිවදන් දුන්නේ කිසියම් ආඩම්බරයක් සිය වතෙහි රඳවා ගනිමිනි.
     "බලන්නකෝ ඔය පර්යේෂණ පත්‍රිකාව එළිදක්වලා තියෙන අවුරුද්ද"
     "ම්.... දෙදහස් තිස් හත.... ඒ කියන්නේ තුන්වෙනි ලෝක යුද්ධයට බොහොම ආසන්න කාලෙක"
     චමිල පැවසීය.
     'ඔව්' යැයි හැඟවීමට ජෙරමි සිය හිස සෙළවීය.
     "මම ඔය පර්යේෂණ පත්‍රිකාව පොඩ්ඩක් කියෙව්වා.... ආචාර්ය හාන්ස් ඇතුළු පිරිස මේ ද්විමය පරිවර්තකය මුලින්ම නිර්මාණය කරලා තියෙන්නේ ඔත්තු බැලීමේ උපකරණයක් විදිහට වත්, ට්‍රාන්ස්මිටරයකට සවි කරන්න තරම් පොඩි උපකරණයක් විදිහටවත් නෙවෙයි. ගුප්තකේතනය (Encrypt) කරපු දත්ත නැවත සාමාන්‍ය දත්ත බවට හරවන්න (Decrypt) පුළුවන් මෙවලමක් විදිහට. "
     හේ මිතුරන් වෙත නෙත් යොමමින් පැවසීය.
     "සෙන්ටි මීටර පරිමාණයෙන් තිබුණු මේ උපාංගය තෙවන ලෝක යුද්දේ කාලෙදී මයික්‍රෝ පරිමාණය දක්වා කුඩාවට නිෂ්පාදනය කරලා තියෙනවා. ඒ හමුදාවේ පණිවිඩ හුවමාරු යන්ත්‍ර තුල සවිකිරීම සඳහා. මේ ක්‍රමය නිසා හමුදා මූලස්ථානයෙන් ලැබෙන ගුප්තකේතනය කල පණිවිඩ එසැණින් නැවත සාමාන්‍ය පණිවිඩයක් බවට පරිවර්තනය කර ගැනීමට හැකියාව ලැබුණා.... එමගින් සතුරු පාර්ශවයන්ට හසු නොවී පණිවිඩ හුවමාරු කර ගැනීමට තිබූ හැකියාව නිසා ඒ කාලේ හමුදා අතර මේ උපාංගය ගොඩාක් ජනප්‍රිය වෙලා තිබිලා තියෙනවා...."
     "එතකොට ට්‍රාන්ස්මිටරය ඇතුලේ තිබිලා අපිට හමුවුණු ද්විමය පරිවර්තකය ඇත්තටම හමුදාවේ පණිවිඩ හුවමාරුවට භාවිතා වුණු එකක්."
     චමිල සිය මිතුරාගේ කථාවේ සාරාංශය ගෙනහැර දැක්වීය.
     "ඔව්, එහෙම කියන්නත් පුළුවන්...."
     "ඒ උපාංගය පාවිච්චි කරන්නේ රහස් පණිවිඩ ආපහු සාමාන්‍ය තත්වයට හරවන්න නම්, ඔත්තු බලන ට්‍රාන්ස්මිටරයකට ඒවගේ දෙයක් සවිකරලා ලැබෙන ප්‍රයෝජනය මොකක්ද?"
     හසාරා විමසා සිටියාය.
     "අන්න ඒක තමයි ප්‍රශ්ණේ කුමරිය....."
     ජෙරමි පැවසීය.
     "මමත් ඔය ගැන කල්පනා කලා.... ට්‍රාන්ස්මිටරය නිර්මාණය කරපු කෙනා නිකරුණේ ඔය උපාංගය ඒකට සවි කලා වෙන්න බැහැ. ඔයාලට මතකද ට්‍රාන්ස්මිටරයේ ද්විමය පරිවර්තකය ළඟම සවි කරලා තිබුණු අනික් උපාංගය ? අර පොඩි ස්පර්ශක දෙකක් තිබුණු එක. මට හිතෙනවා ඒ උපාංගය ද්විමය පරිවර්තකයෙන් සිදු කරන ක්‍රියාවලියට සෘජුවම බලපෑමක් කරනවා කියලා...."
     "ම්.... ම්.... ඒක තේරෙන භාෂාවෙන් කිව්වොත් ?"
     චමිල විමසීය.
     "ඒ කියන්නේ ද්විමය පරිවර්තකයෙන් වෙන්නේ මොකක්ද කියන එක හොයාගන්න නම්, මුලින්ම අපිට ස්පර්ශක තියෙන උපාංගයේ කාර්යය මොකක්ද කියලා හොයාගන්න වෙනවා කියන එකයි."
     ජෙරමි පැවසීය.
     "ඔයාට මොකක්හරි අදහසක් තියෙනවද ඒ ගැන?"
     හසාරා විමසා සිටි අතර 'නැත' යි හැඟවීමට ජෙරමි හිස සැළීය.
     "එහෙනම් ඉතින් අපි තාමත් ඉන්නේ පටන් ගත්ත තැනම තමයි"
     චමිල පැවසුවේ දුර්මුඛ ස්වරයෙනි.
     "ට්‍රාන්ස්මිටරය සවි කරපු කෙනාවත්, ඒකේ නියම කාර්යභාරය වත් අපි තාම දන්නේ නැහැ."
     "හරි, හරි යාළුවනේ.... අධෛර්යමත් වෙන්න එපා...."
     චමිල හා හසාරාගේ මුහුණු වල ඇඳුනු බලාපොරොත්තු බිඳුනු පෙනුම දුටු ජෙරමි පැවසීය.
     "ද්විමය පරිවර්තකය ගැන තියෙන පර්යේෂණ පත්‍රිකාවෙන් ඒක විකේතනයට උදව් වෙන්න පුළුවන් කරුණු ගොඩක් මට හොයාගන්න පුළුවන් වුණා.... ඉක්මනින්ම අපිට හොඳ ආරංචියක් අහන්න ලැබෙයි...."
     සිය මිතුරන්ගෙන් පිළිතුරක් බලාපොරොත්තුවෙන් ජෙරමි නිහඬ වුවද කිසිවෙකුත් යමක් කීමට උත්සාහ දැරුවේ නැත.
     "ට්‍රාන්ස්මිටරය ගැන පොඩ්ඩකට අමතක කරන්නකෝ.... මා ළඟ තව රසවත් කථාවක් තියෙනවා...."
     අවසානයේ ජෙරමි නිහැඬියාව බිඳිමින් පැවසුවේය.
     "හා.... හා.... හිත සැනසෙන්න ඒකවත් කියන්නකෝ එහෙනම්...."
     චමිල ඉල්ලා සිටියේය.
     "හරි, මේ කථාව ද්විමය පරිවර්තකය හොයාගත්ත ආචාර්ය හාන්ස් ඇතුළු පිරිස, ග්‍රහකය ජීවත් වෙන්න ගිය හැටි ගැන.... "
     "ග්‍රහකයක ! !"
     හසාරා හා චමිල එකවිට විමතියෙන් හඬ නැගූහ.
     "ඔව්, ඉස්සෙල්ලම කියන්නකෝ ඔයාලා අහලා තියෙනවද 'තේමිස් විසි හතර' කියලා ග්‍රහකයක් ගැන?"
     'නැත' යි හැඟවීමට දෙමිතුරෝ හිස් සෙළවූහ.
     " 'තේමිස් විසි හතර' කියන්නේ දෙදහස් නවය තරම් ඈත කාලයකදී ග්‍රහක වලල්ලෙන් හොයා ගත්ත අයිස් බහුල ග්‍රහකයක්. ඒ කාලෙදී ඉඳන්ම විද්‍යාඥයෝ අනුමාන කලා අයිස් බහුලව පැවතීම නිසා මේකේ යම්කිසි ජීවයක් තියෙන්න පුළුවන් කියලා.... නමුත් ඒ බව සනාථ කරගන්න තරම් පර්යේෂණ සිදුවෙලා නැහැ. හරි, අපි කථාවට යමු.
     තුන්වන ලෝක යුද්ධයට අවශ්‍ය උපකරණ හදන්න උදව් කලත් ආචාර්ය හාන්ස් ලෝක යුද්ධට එතරම් කැමැත්තෙන් හිටපු කෙනෙක් නෙවෙයි. ලෝක යුද්ධය නිසා පෘථිවිය විනාශ වෙලාමනුෂ්‍ය වර්ගයා සම්පූර්ණයෙන්ම නැතිවෙලා යාවි කියන මතයේ හිටපු කෙනෙක් තමයි එයා. ඒ නිසා තුන්වන ලෝක යුද්ධයට කලින් කුමරියගේ මුතුන් මිත්තෝ හැත්තෑ නව වෙනි ග්‍රහලෝකයට ගියා වගේ එයත් ප්‍රසිද්ධියේ යෝජනා කරනවා මනුෂ්‍ය වර්ගයා සමූල ඝාතනයෙන් බේරගන්න, දැනට ජලය තියෙනවා කියලා හඳුනාගත්ත 'තේමිස් විසි හතර' ග්‍රහකයට " මිනිස්සු පිරිසක් ගිහින් ජනාවාස ඇතිකල යුතුයි කියලා.... ඒ කාලේ හැටියට වුණත් මේක මහා විකාර අදහසක් වගේ තමයි පෙනිලා තියෙන්නේ. ඒ නිසා ආචාර්ය හාන්ස්ව ඒ කාලේ මිනිස්සු 'උමතු විද්‍යාඥයා' කියලත් හඳුන්වලා තියෙනවා...."
     ජෙරමි මොහොතකට සිය කථාව නැවැත්වීය.
     "කවුරු මොනවා කිව්වත් ආචාර්ය හාන්ස් තමන්ගේ අදහස වෙනස් කරලා නැහැ. මේ වෙනකොට ඒ අදහසට එකඟ වුණු පිරිසකුත් ඔහු එක්ක ඉඳලා තියෙනවා.... තුන්වන ලෝක යුද්ධයේ මැද භාගය වෙනකොට බොහොමයක් ප්‍රවෘත්ති වාර්තා කරනවා ආචාර්ය හාන්ස් ඇතුළු පිරිස හිටි හැටියේම අතුරුදන්වී ඇති බව. ගොඩාක් දෙනා විශ්වාස කලේ ආචාර්ය හාන්ස් තමන්ගේ පිරිසත් එක්ක 'තේමිස් විසි හතර' ග්‍රහකයට යන්න ඇති කියලයි. ඒ සඳහා ඔවුන් යොදාගන්න ඇතැයි අනුමාන කරපු ක්‍රම ගණනාවක්ම ඒ කාලේ පුවත්පත්වල සඳහන් කරලා තියෙනවා...."
     අනතුරුව හේ පුවත්පත් වාර්තා කිහිපයක් පරිගණකයේ තිරය මත දර්ශණය කරවීය.
     "මේවා අතරින්, වැඩියෙන්ම පිළිගත්ත අනුමානයන් දෙකක් තියෙනවා.... එකක් තමයි ආචාර්ය හාන්ස් ඇතුළු පිරිස රොකට්ටුවක් ආධාරයෙන් පෘථිවියෙන් නික්මිලා තේමිස් විසි හතරට ගියා කියන එක. මේක ඇත්තක් කියලා සනාථ වෙලා නැති වුණත් ඒ කාලේ කක්ෂගත මිසයිල රඳවන්න දිනපතා රොකට් ගුවන් ගත කිරීම් විශාල ප්‍රමාණයක් සිදු කරලා තියෙන නිසා එයින් එක් රොකට්ටුවකින් කාටත් සැක නොහිතෙන්න ඔවුන් පිටත් වෙලා යන්න ඇති කියලා අනුමාන කරනවා....
     අනෙක් අනුමානය තමයි ආචාර්ය හාන්ස් ඇතුළු පිරිස හඳට ගිහින්, චන්ද්‍ර ගුවන්ගත කිරීමේ මධ්‍යස්ථානයෙන් තේමිස් විසි හතරට යන්න උත්සාහ කරද්දී, ඔවුන් ගමන්ගත් යානය පිපිරීමෙන් ජීවිතක්ෂයට පත්වුණා කියන එක. මේ අනුමානය සනාථ කරන්න පුළුවන් සාක්ෂියක් හමුවෙලා තියෙනවා. ඒ තමයි හඳේ අඳුරු පැත්තෙන් ගුවන්ගතවී පුපුරා ගිය අභ්‍යවකාශ යානයක පිපිරීම සටහන් වුණු වර්ණාවලී ඡායාරූපයක්. මේ ඡායාරූපය විශ්ලේෂණය කරද්දී මේ යානයේ මිනිසුන් සෑහෙන ප්‍රමාණයක් ගමන් කරමින් ඉඳලා තියෙනවා කියලා හෙළිවෙලා තියෙනවා.... ඔවුන් සියළු දෙනාම පිපිරීමෙන් මිය යන්න ඇති කියලා තමයි විශ්වාස කරලා තියෙන්නේ. කොහොම වුණත් ඒ කාලේ තිබුණු යුදමය වාතාවරණයත් එක්ක කවරුත් තව දුරටත් මේ ගැන හොයලා නැහැ
     හැබැයි මේ සිදුවීම් වලට පස්සේ ආචාර්ය හාන්ස්ව සියැසින් දැකපු අයත් ඉඳලා තියෙනවලු.... කොහොම වුණත් හුඟ දෙනෙක් විශ්වාස කරන්නේ ආචාර්ය හාන්ස් ඇතුළු පිරිස තමන්ගේ අභිප්‍රාය සාර්ථක කරගන්න ගිහින් ජීවිතක්ෂයට පත්වුණා කියන එක. මොකද ඔවුන් තමන්ගේ ඉලක්කයට ලඟා වුණා නම්, මේ වෙනකොට එයාලාගෙන් අපිට යම්කිසි පණිවිඩයක්වත් ලැබෙන්න ඕන නිසා. නමුත් කවුද දන්නේ එයාලා පෘථිවිය සම්පූර්ණයෙන්ම අමතක කරලද කියලා...."
     ජෙරමි තම කථාව අවසන් කරමින් පැවසීය.
     "අයියෝ.... මගේ හිත තවත් කැඩිලා ගියා...."
     චමිල පැවසුවේ නළල මත සුරත තබමිනි.
     "ඒ වුණාට මට නම් ඒක රසවත් කථාවක්...."
     හසාරා පැවසුවාය. ඇගේ අදහසට එකඟ නොවන බව පෙන්වමින් චමිල හිස සෙළවීය.
     "මට නම් දැන් රසවත් වෙයි කියලා හිතන්න පුළුවන් එකම දේ අපේ රෑ කෑම වේල විතරයි...."
     අනතුරුව හේ තම අසුනින් නැගී සිටියේය.
     "ඒ වගේම තමයි අපි තවත් ප්‍රමාද වුණොත් ඒකත් 'ජීවිතක්ෂයට පත්වෙලා' යාවි...."
     ඔහු පැවසුවේ සිය දෑස් නුදුරින් වූ කවුළුව වෙත යොමමිනි.
     කෘත්‍රිම ආලෝක ප්‍රභවයන්ගෙන් යම් තරමකට අඳුර පළවා හරිනු ලැබූ විදුහල් බිම අඳුරේත් ආලෝකයේත් සම්මිශ්‍රණයක් මවා පාමින් ඉසිලූයේ පාළු ස්වභාවයකි. නිමාවක් නොමැතිව නද දෙන නිශාචර කෘමීන්ගේ හඬ, පරිසරයේ වූ නිහැඬියාව බිඳ දමමින් සවන් කරා ඇදී එයි. නේවාසිකාගාරයේ සිට දිවෙනා මාවත පුරා දිගු සෙවණැළි රටා මවමින් සිසු සිසුවියන් එකා දෙන්නා අවන්හල කරා ඇදෙනු පෙනේ. තවත් මොහොතකින් තෙමිතුරන්ගේ රූ ද ඒ අතරින් දිස්වී ක්‍රමයෙන් අන්ධකාරය හා මුසුව නොපෙනී යන්නට විය.

2 comments:

  1. නියමයි නියමයි... :-)

    ReplyDelete
    Replies
    1. ගොඩක් ස්තූතියි ! ආයෙත් ඇවිත් යන්න එන්න

      Delete